PRASASTI DE ANGLURAH KEDANGKAN ANTUK BAHASA BALI

PRASASTI DE ANGLURAH KEDANGKAN

Om, Awignam Mastu NamaSidham.

Om, Pasupati Rajate Putrah.

Atur pangaksaman tityang majeng ring Paduka Bhatara Hyang Mami. Mangdane ledang ngicenin wara nugraha , purun kadi tityang ngamet Iratu sane sampun meraga Bhatara, minakadi Hyang, taler mangdane tityang nenten kebawosang alpaka, duaning tityang purun nyurat daging – daging babad sane kebawosang pingit sane sampun kapasupati, kalingganin olih Ida Hyang Purwa Tatwa. Lamane tityang nenten keni sotsot cakra bawan Iratu pamekas ring Ida Bhatara Kawitan, mangdane tityang setata kicen kerahajengan, sapunika taler ring sameton tityang sami Ngantos ring jagate kapungkur wekas.

Inggih minabta nenten sida antuk tityang ngaturang lamine kewentennane puniki. Pinaka pamucuk carita sane katur, duaning wenten kebawosang ring prasasti De Anglurah Kedangkan, sane malinggih ring Banjar Kawan Desa Selisihan Klungkung. Duk punika Ida maduwe putra lelima inggih punika :

Kang Panua apuspita : Pasek Dangka Taro,

Ida magenah ring Desa Taro, Tegallalang, wewidangan Gianyar.

Kang Madya apuspita : Pasek Dangka Penida,

Ida magenah ring Banjar Penida Kaler, Desa Penida, Tembuku wewidangan Bangli.

Kang Trini apesajnya : Pasek Dangka Bangbang,

Ida magenah ring Banjar Bangbang Kaler, Tembuku Bangli.

Kang Catur apenengeran : Pasek Dangka Dukuh Nyalian,

Ida magenah ring Banjar Dukuh Nyalian wewidangan Banjarangkan.

Kang Wungsu apasasih : Pasek Dangka Selisihan,

Ida magenah ring Banjar Kawan Desa Selisihan wewidangan

---

Klungkung, sane maayu sang kemimitan Ida De Anglurah
Kadangkan maring Desa Selisihan.

Sapunika kebawosang ring lepian Ida.

Inggih bawosang mangkin kewentenan Ida Pasek Dangka Selisihan, ngemijilang raris putra lanang asta diri akeh nyane luwir ipun :

Kang Panua apuspita : Pasek Dangka Timuhun,

alungguh maring Desa Timuhun wewidangan Banjarangkan.

Kang Madya apepasih : Pasek Dangka Selumbung,

alungguh maring Banjar Kaleran Desa Selumbung wewidangan Karangasem.

Kang Trini apesajnya : Pasek Dangka Ayung,

Alungguh maring Desa Ayung wewidangan Klungkung

Kang Catur apenengeran : Pasek Dangka Rendang Baler Pasar,

alungguh maring Banjar Baler Pasar Rendang wewidangan Karangasem.

Kang Panca apuspita : Pasek Dangka Kesiman Batanbuah,

alungguh maring Banjar Batanbuah Kesiman Badung.

Kang Sad apepasih : Pasek Dangka Batutinding Kintamani Kaja,

alungguh maring Kintamani Kaja wewidangan Bangli.

Kang Sapta apuspita : I Made Pasek,

alungguh maring Banjar Kawan Desa Selisihan wewidangan Klungkung.

Kang Asta apepasih : I Nyoman Pasek,

alungguh maring Banjar Kawan Desa Selisihan wewidangan Klungkung.

Ida sareng kalih, I Made Pasek lan I Nyoman Pasek sane maayu sang kamimitan sira yayah, ( Sang ngemit Kawitan Ida De Anglurah Kadangkan ).

Inggih sane mangkin kelanturang uningayang parindikan kewentenan putran Ida Pasek Dangka Selisihan sane Kang Panua ( sane pinih duur ) sane mapesengan Pasek Dangka Timuhun, Ida ngemedalang putra lanang kekalih :

---

Kang Panwa apuspita, Pasek Dangka Pesaban, alungguh maring Desa Pesaban wewidangan Karangasem.

Kang Wungsu maayu sang kemimitan sira yayah maring Timuhun.

Putran Ida Pasek Dangka Selisihan sane Kang Madya, sane mapesengan Pasek Dangka Selumbung Kaleran, madua putra lanang, saha ngemit kawitan ajin Idane irika ring Desa Selumbung.

Putran Ida Pasek Dangka sane kaping Trini, sane mapesengan Pasek Dangka Ayung, Ida ngamijilan putra kekalih sane pinih Duur mapesengan Pasek Dangka Paksa Bali, magenah ring Desa Paksa Bali, Dawan Klungkung, sane alitan ngemit kawitan ajine irika ring Desa Ayung.

Parindikan putran Ida Pasek Dangka Selisihan sane kaping Pat, mapesengan Pasek Dangka Rendang Baler Pasar, madue putra lanang kekalih, sane pinih duur mapesengan Pasek Dangka Guwang Sakih, magenah ring Banjar Sakih Desa Guang Sukawati Gianyar. Putran Idane sane wungsu ngemit kawitan ajin Idane irika ring Desa Rendang Baler Pasar. Lanturang mangkin uningang kewentenann Pasek Dangka Guang Sakih, Ida ngamijilang raris putra tetiga, sane pinih duur mapesengan Pasek Dangka Pegok, magenah ring Pegok Sesetan Badung, sane madenan mapesengan Pasek Dangka Batuyang, magenah ring Batuyang Sukawati Gianyar, sane pinih alit mangemit kawitan ajine irika ring Desa Guang.

Inggih mewali tityang nguningayang parindikan putran Ida Pasek Dangka Selisihan sane pawilangan kaping lima, sane mapesengan Pasek Dangka Kesiman Batanbuah, Ida maduwe putra akutus ( asta ) luwire :

Kang Panwa apepasih : Pasek Dangka Tonja Batanancak,

alungguh maring Desa Tonjabatanancak, Kesiman Badung.

Kang Madya apuspita : Pasek Dangka Pagutan Padang Sambian,

alungguh maring Desa Pagutan Padang Sambian Badung.

Kang Trini apesajnya : Pasek Dangka Jambe Kerobokan,

alungguh maring jambe kerobokan, Kuta Badung.

Kang Catur apepasih : Pasek Dangka Sedang Koripan,

alungguh maring Sedang Koripan, Abiansemal Badung.

---

Kang Panca apuspita : Pasek Dangka Biutankalah,

alungguh maring Buitankalah, Batubulan, Sukawati Gianyar.

Kang Sad apepasih : Pasek Dangka Peraupan,

alungguh maring Peraupan, Peguyangan Kangin Denpasar.

Kang Sapta apuspita : Pasek Dangka Bukit Ungasan,

alungguh maring Bukit Ungasan Kuta Badung.

Kang Wungsu : Jumenek maring kedatuan angemit kamimitan Ida maring Kesiman Batanbuah.

Inggih risampune kasuen – suen putran Ida Pasek Dangka Batanbuah sane pawilangan kaping kalih, sane mepesengan Pasek Dangka Pagutan Padangsambian maduwe raris putra kekalih, sane pinih duur mepesengan Pasek Dangka Dalungkung, magenah ring Dusun Kung Dalung Kuta Badung. Sane wungsu wantah ngemit kawitan ajine irika ring Padangsambian.

Putran Ida Pasek Dangka Kesiman Batanbuah sane pawilangan kaping Trini sane mepesengan Pasek Dangka Jambe Kerobokan, ngamedalang raris putra tetiga :

Sane pinih duur mapesengan : Pasek Dangka Batuparas,

Magenah ring Batuparas Padangsambian Denpasar Barat.

Sane madenan mepesengan : Pasek Dangka Sengguan Buduk,

Magenah maring Sengguan Buduk Mengwi Badung.

Sane pinih alit : ngemit kamimitan Ajine ring Jambe Kerobokan.

Risampune tenggep katurang indik pabancangah Ida Pasek Dangka Kesiman Batanbuah, ngiring mangkin lanturang nguningayang parindikan putran Ida Pasek Dangka Silisihan ring pawilangan kaping enem sane mepesengan Pasek Dangka Batudinding Kintamani Kaja, Ida maduwe putra lanang turmaning ngemit raris kamimitan Ajine irika ring Batudinding Kintamani Bangli.

Mungguhin putran Ida Pasek Dangka Selisihan ring pawilangan kaping pitu sane mepesengan I Made Pasek, maduwe oka lanang sane mepesengan Pasek Sri Asih, megenah ring Banjar Kawan Desa Selisihan Klungkung.

---

Putran Ida Pasek Danggka Selisihan ring pawilangan kaping sange, sane mepesengan I Nyoman Pasek puniki pinih alit maduwe oka lanang asiki sane mepesengan Pasek Karya , taler megenah ring Banjar Kawan Desa Selisihan Klungkung.

Sapunika kaunggahan indik pabancangah Pasek Dangka Selisihan.

Inggih kasuen – suen malih wenten kauningang, wantah pernah keanggen putu ring Ida Pasek Dangka Penida, keputra antuk Pasek Dangka Bungbungan Kaleran, sane mepesengan Pasek Dangka Semampan Blahbatuh kesarengin putran Idane sane mepesengan Pasek Dangka Gelumpang Sukawati, taler Pasek Dangka Siladan Tamanbali, putran Ida Pasek Dangka Dukuh Nyalian Banjarangkan, mapikayun raris pacang sareng ngemit kemimitan Ida, iriki ring Pura Agung Pasek Dangka Selisihan linggih Ida De Anglurah Kadangkan. Rikala punika kewentenan warih – warih Ida Pasek Dangka Selisihan, eling raris daging bisaman Ida Mpu Ketek sane ngandikayang sapuniki :

Yening ada ane ngangkenin menyama tekaning pasek mwang bendesa, eda pesan tara ngangkenin menyama, nanging tatasang malu, yening suba anut kapining unduk, kadi ucaping prasasti muwang piyagem, to patut tiwakin pasobayan mekadi upasaksi ring bhatara kawitan. Yen twah tuara manut ento cihna mula tuara menyama, yan manut mula nyama sujati.

Duaning sanepacang sareng ngemit Bhatara Kawitan punika sampun pastika anut, raris saking rahina punika sareng ngemit kawitane. Risampune raris wenten wicara kadi punika, raris sang sane ngemit kawitan Pasek Dangka Selisihan, Palinggih De Anglurah Kadangkan ngawentenang pasungkem kadi ring sor :

Sapasira Ugi sane pacang mapikayun sareng ngemit kemimitan / kawitan Ida ring Pura Agung Pasek Dangka Selisihan, linggih Ida De Anglurah Kadangkan mangdane nginutin indik bisaman Ida Mpu Ketek, pinaka tatatiti lan sila krama, sida raris anggen pamikukuh ring sajroning nyanggra lan ngemit kemimitan / kawitan Idane.

Wus punika raris wenten semeton mapikayun pacang sareng ngemit kamimitan Ida inggih punika :

Semeton Pasek Dangka Abian Pandan Ubud Gianyar,

Semeton Pasek Dangka Saba Blahbatuh Gianyar,

Semeton Pasek Dangka Pikat Dawan Klungkung,

---

Kasurat antuk

Jero Mangku Kajang Pasek Dangka Selisihan,

Ring rahine Saniscara Umanis Medangkungan Panglong Ping Kutus Ring Sasih Kedasa Isaka 1930.

Jero Mangku Kajang Pasek Dangka Selisihan,

I Ketut Notes

---